Chan eil grùdach idir aig Dwelly, ach tha e fhathast beò ‘s a’ breabadh air feadh Uibhist a-Deas agus Éirisgeigh.
Tha tionndadh snog ùr-nodha aig Catrìona Walker [Éirisgeigh] air: “grùdach ann an drathar neo grùdach ann am baga, ma bha rud àraid a dhìth ort ’s nach robh thu a’ faighinn sgeul air… bidh mi ga chleachdadh fhathast….bhiodh sinn a’ grùdach airson faochag nuair a bha sinn beag.”
Tha làn eòlas aig Domhnall Ruaraidh Caimbeul an Uibhist a Deas air an fhacal:
“Bidh mi ga chleachdadh gu math tric mi fhìn. Tha cuimhne agam nuair a bhiomaid a’ buain na mònadh, ann an sgioba mònadh, bha iad ìseal, dh’fheumadh tu an uaireadair a thoirt dheth, air neo bha i fàs car fliuch, agus dh’fhaodadh tu a chur ‘nad phòca, is an ath rud, thuiteadh e dhan pholl mhònadh is dh’fheumadh tu a bhith grùdach sa pholl mhònadh gus am faigheadh tu e. ‘S an uair sin ma bha thu treiseag ga fhaighinn, an fheadhainn as do dhéidh, bha iad a’ fàs greannach. Se grùdach a tha sin, siubhal an rud a chaill thu. An seòrsa obair a th’ agam, se plumair a th’ annam, agus bidh mi gu math tric a’ grùdach ann an rudan gu math neònach, ach feumaidh cuideigin a dheanamh!”