Tha mabladh aig Dwelly air hacking or maiming, agus moibleadh air gnaw, half-chew, mumble, mutter.
Seo am facal ann an earrann làidir, le Aonghas Caimbeul ann an Suathadh Ri Iomadh Rubha, 1973: “Tha ar cànan àluinn, ceòl is ceileireachd ar banaltrumais, cridhe is anam na bha tlachdmhor ‘nar n-eachdraidh is ‘nar n-oideas, air a mabladh is air a stròiceadh aig gineal Ghàidheil gun spéis, gun phròis mu an coir-bhreith is mu an cànan.”
Tha mabladh fhathast bitheanta; théid a chleachdadh air cagnadh bidhe, ach tha a’ chuid as motha de dhaoine ris an do bhruidhinn mi ga cheangal ri labhairt chabhagach mhì-shoilleir: “a’ mabladh nam faclan”.
Tha Màiri Thormoid ag ràdh gu bheil e fhathast bitheanta. “Nach canainn fhìn, nan tachradh duine rium nach robh math gu bruidhinn, is math dh’fhaodte smùid bheag de dheoch air, gum biodh e mabladh nam faclan.” Cuideachd air ithe: “Mura biodh fiaclan annad tha thu dìreach a’ mabladh”