An robh facal a dhìth ort riamh air na deannan beaga duslaich a chì thu ann an gath grèine? Air a bhith a’ dinneadh rudeigin mòr a-staigh do tholl beag? Tha Sly Cooking ag ath-bheothachadh 42 facal iongantach a chruinnich Mgr Ailein Dòmhnallach (1859–1905) ann an Uibhist a-Deas ’s ann an Éirisgeigh. Bha Mgr Ailein ’na shagart, ’na bhàrd ’s ’na bheul-aithrisiche.
Chaidh na facail a chlò-bhualadh an toiseach ann an 1958, am measg nam mìltean fhaclan eile a thug Iain Latharna Caimbeul bho notaichean Mhaighstir Ailein ann an Gaelic Words and Expressions from South Uist and Eriskay. ’S mi air mo bheò-ghlacadh leis an fhaclaire seo, chuir mi romham an fheadhainn as fheàrr leam a thoirt beò a-rithist le leabhar beag làn ghearraidhean-lino – Sly Cooking: 42 irresistible Gaelic words.
Beag air bheag dh’fhàs am pròiseact na bu mhotha. Cho math ri leabhar, chaidh e ’na thaisbeanadh ealain ’s ’na phrògram telebhisean. A-nis tha e ’na làrach-lìn cuideachd! Seo far am faigh thu fiosrachadh nas mionaidiche air gach facal a tha ann an Sly Cooking, agus tha thu làn dì-bheathte am fiosrachadh agad fhèin a chur ris.
Tha an leabhar ’s an ealain thùsail ri’n ceannach anns a’ bhùth Etsy agam, agus faodaidh sibh tuilleadh ionnsachadh mun obair ealain agam air www.black-prints.com. Tha mi ’n dòchas gun còrd i ruibh!
Catrìona Black
Se relief printmaking a th’ ann an gearradh lino, coltach ri gearradh fiodha, far am bi thu a’ gearradh pìosan lino air falbh le sgian shònraichte, agus a’ roladh inc air a’ chuid a tha air fhàgail mus brùth thu pàipear air gus priont a dhèanamh. Chleachd Picasso agus Escher an dòigh-obrach seo, a thòisich anns a’ Ghearmailt aig toiseach na 20mh linn.